Почна асфалтирањето на улицата Есенинова, која ќе ги поврзува Кисела Вода, Аеродром и Центар

Екипите на Град Скопје деновиве почнаа со асфалтирање на улицата Есенинова, чие пробивање почна минатото лето.

Како што информираат градските власти, со оваа нова траса се добива уште едно сообраќајно поврзување на Кисела Вода, Аеродром и на Центар, односно булеварите Борис Трајковски и Трета македонска бригада.

Новоизградената улица Есенинова ќе биде долга 730 метри, со променлива ширина, односно ќе има две коловозни ленти и тротоари од двете страни во Кисела Вода, а потоа четири коловозни ленти пред влезот во Трета македонска бригада.

Предвидено е да се постави улично осветление со 20 столба, нова водоводна и канализациска мрежа и да се дислоцираат постојните резервоари и бунари што се наоѓаат на таа локација.

„Улицата е од огромно значење за жителите на Кисела Вода, Аеродром и на Центар зашто претставува трето поврзување на урбаните делови на Аеродром и Кисела Вода. Булеварот Трета македонска бригада со должина од 2,5 километра има само 2 поврзувања со Кисела Вода, едното преку булеварот Србија со булеварот Борис Трајковски, а второто, познатото тесно грло кај 'Тутунски комбинат', кое воедно го поврзува Аеродром и со Кисела Вода и со Центар. Со изградбата на 'Есенинова' ова тесно грло во сообраќајот ќе се растовари, ќе се скрати кружењето околу 'Тутунски', кое во периодите на најголемиот сообраќаен метеж трае од 5 до 10 минути“, посочуваат од Град Скопје.




© Скопски портал. Сите права се заштитени.