ООУ „Киро Глигоров“ во потесен избор за наградата на ЕУ за современа архитектура, Мис ван дер Рое 2022

Општинското основно училиште „Киро Глигоров“ влезе во потесен избор за наградата на Европската Унија за современа архитектура, Мис ван дер Рое за 2022-ра година (EU mies award).

„Ми претставува особена гордост и задоволство што нашето најубаво и најмодерно основно училиште, ‘Киро Глигоров’ влезе во потесен круг за наградата на ЕУ за современа архитектура, Мис, за 2022-ра година. Оваа номинација е големо меѓународно признание за ООУ ‘Киро Глигоров’ и уште една потврда за нашата посветеност на работата“, изјави градоначалникот на Општина Центар, Саша Богдановиќ.

Наградата на ЕУ за современа архитектура, воспоставена во 1987-ма година како еднакво партнерство помеѓу Европската комисија, Европскиот парламент и фондацијата Мис ван дер Рое, се одржува на секои две години и ги избира најдобрите од кругот на најквалитетните современи архитектонски дела во Европа.

ООУ „Киро Глигоров“ е првото основно училиште изградено во Општина Центар по 5 децении.

Училиштето се простира на вкупна површина од 16.200 м2 (12.100 м2 училишна зграда и 4.100 м2 дворна површина), изработено е по сите светски современи стандарди и при неговата изградба се користени најквалитетни материјали.

Автор на идејното решение за ООУ „Киро Глигоров“ е архитектот Бесиан Мехмети д.и.а., координатор на проектот, Кире Секуловски д.г.и., изведувач на градбата е „Вардар Градба“, надзорот врз градбата го вршеше „Завод за испитување на материјали“ (ЗИМ) Скопје, а градено е врз основа на проектот на тимот од „Инком Инженеринг“.




© Скопски портал. Сите права се заштитени.